(Last Updated On: )
پہلا منظومہ
ترمرے واہمے نظر کے ہیں
پار شعلوں کے دیکھنا جیسے
پانیوں کی سیاہ غاروں میں
مچھلیاں سر پٹخ رہی ہوں گی
رنگ،منظر تو روشنی سے ہیں
روشنی ہے مگر یقیں دل کا
***
دوسرا منظومہ
دائرے دائروں میں گھومے تھے
ایک سے دوسرے بھنور تک، ہم
موج در موج خوشبوئیں رقصاں
لمحہ لمحہ یہ ٹوٹتی سانسیں
ایک دوجے کی سوچ کا محور
اور یوں خواب سے نظر تک ہم !
***
تیسرا منظومہ
کوئی صحرا تھا یا سمندر تھا؟
تھا مگر بے کنار و بے پایاں
ایسی بے سمت بھی نہیں تھی یہ
زندگی آشنائے منزل تھی
لغزشِ پا ہے یا فریبِ نظر؟
ریگِ صحرا پہ ہیں بھنور رقصاں
***
