محافظِ روشِ رفتگاں، کوئی نہیں ہے

محافظِ روشِ رفتگاں، کوئی نہیں ہے
جہاں کا میں ہوں مِرا اب وہاں کوئی نہیں ہے
محاذِ زیست کے ہر معرکے میں فتح کے بعد
کھُلا، کہ حاصلِ عمرِ رواں کوئی نہیں ہے
ستارگاں سے جو پوچھا، کہ اُس طرف کیا ہے
چمک کے بولے کہ اے جانِ جاں! کوئی نہیں ہے
نگاہِ یار، نہ آب و ہوا، نہ دوست، نہ دل
یہ ملکِ عشق ہے یاں مہرباں کوئی نہیں ہے
فلک پہ چاند ستارے، زمیں پہ لالہ و گُل
بس ایک میں ہوں کہ نام و نشاں کوئی نہیں ہے
کچھ اعتبار اگر ہے تو حرفِ خیر کا ہے
جُز اس کے اور سخنِ جاوداں کوئی نہیں ہے
گزشتگانِ محبت کے خواب لکھنے کو
ابھی تو میں ہوں مگر بعد ازاں کوئی نہیں ہے