(Last Updated On: )
قلم اور آنکھیں
قلم سے لکھنا
پیار کے قصے
ہم نے کب کا چھوڑ دیا
اب تو ساری پیار کی باتیں
پیار کے قصے
آنکھوں سے ہم لکھتے ہیں
آنکھوں سے ہم سنتے ہیں
۔۔۔۔۔۔۔۔۔۔۔۔۔۔۔۔
لمحۂ آزار
جانے کس لمحہء آزار کی آمد ہے یہاں؟
رات ہی رات میں
کتنے ہی پرندوں نے مرے شہر سے ہجرت کر لی
پھر بھی گھر بھر میںاک امید کی لو روشن ہے
اور آنگن کی ہر شاخ سے
لپٹی ہوئی بے نام اداسی نے
یہ پوچھا ہم سے
موسم گل نے بھلا واقعی اب
آنے کی حامی بھر لی؟
۔۔۔۔۔۔۔۔۔۔۔۔۔۔۔۔
اے مِرے کوزہ گر
اے مِرے کوزہ گر
گیلی مٹی ہوں میں چاک پرتیرے رکھی ہوئی
آشنا ہوں تری انگلیوں کے ہر انداز سے
مجھ کو بے کارسانچوںمیں مت ڈھال اب
اپنے اَ ن دیکھے خوابوںکی دنیا میں جا
اور وہاں کے کسی ایسے پیکرکو تصویر کر
جو جہانِ ہنر میں
ترے اور مٹی کے رشتے کی تجدیدہو
پھر مجھے تو بنا،چاہے جو بھی بنا،
تا، ترے میرے رشتے کی تکمیل ہو۔
۔۔۔۔۔۔۔۔۔۔۔۔۔۔
میری آنکھیں
میری آنکھیں
فقط آنکھیں نہیں ہیں
یہ دروازے ہیں
تہہ خانہ ٔ دل کے
جہاں پر میں نے اپنی عمر بھر کے
محبت کے فسانے ،اور
یادوں کے خزانے
زندگی بھر کے زمانے قید رکھے ہیں
