(Last Updated On: )
وحشتیں بازاروں میں ارزاں ہوئیں
گھر میں آ کر دردِ بے درماں ہوئیں
پھیر لی تو نے نگاہِ التفات
میری ساری مشکلیں آساں ہوئیں
آئینہ خانوں میں عکس آرا ہوں کیا
خاک میں کیا صورتیں پنہاں ہوئیں
آ گیا مقتل میں دیوانہ کوئی
بستیوں کی بستیاں ویراں ہوئیں
تھی وہ بیگانہ روی یا گمرہی
کفر کی سب دعوتیں ایماں ہوئیں
کیا کہوں ان داستانوں کو میں، جو
بے نیاز کاوشِ عنواں ہوئیں
بے مزہ ضبط و تحمل پر ضیا
لذتیں فریاد کی نالاں ہوئیں
٭٭٭
