(Last Updated On: )
جان لیوا دردِ بے درماں ہوا
میں ہوا پیدا تو وہ پنہاں ہوا
لمس نوک خار کو اب کیا کہوں
رنگ و بو سے گل تہی داماں ہوا
دھوپ یخ بستہ تھی لا وا چاندنی
دل کی بربادی کا جب ساماں ہوا
مختصر تھی چار دن کی زندگی
مرتے ہی آخر امر انساں ہوا
بے حقیقت کھو کھلے افسانے پر
حیرتی آئینہ عنواں ہوا
سر گرانی، قتل و غارت، صبح شام
آدمی کا خون کیا ارزاں ہوا
ٹکڑے ٹکڑے کر کے ایٹم کو ضیا
سعیِ لا حاصل پہ خوش انساں ہوا
٭٭٭
