(Last Updated On: )
جو اکھ توں پیندا ایہو ای کہندا کمال ساقی کمال کردے
کسے نوں اج تک سمجھ نہ آئی کی ہین اکھیاں دے نال کردے
ترے غماں توں میں صدقے سوہنا جو حال وچ نیں بے حال کردے
کہ ہتھ ملا کے خدا تے بندے دا رابطہ نیں بحال کردے
اوہ ٹیک جتھے لگان سوہنے تے پیر جتھے ٹکان سوہنے
کھجور ہووے، پہاڑ ہووے دھمال کردے دھمال کردے
خدا دا قرآن مینوں دسدا توں جان توں وی ایں نیڑے وسدا
ایہ ساہ میرے جو آندے جاندے حضور تیری ای بھال کردے
کریم دا میں کرم کی دساں مثال دیواں تے کیویں دیواں
غلام نوں دے کے شان آقا مثال توں بے مثال کردے
میں کون آں جو عظیم آقا رحیم آقا دی نعت لکھاں
کریم خود ای کرم کما کے خیال وچ نیں خیال کردے
کرم کما کے تے آئو آقا خدائی مہنا ایہ ماردی اے
جے تیتھے اعجاز سائیں ہوندے تے تیری آ کے سمھال کردے
