(Last Updated On: )
عشق دی کھیڈ رچا کے تے بجھا لے دوزخ
جان آقا توں لٹا کے تے بجھا لے دوزخ
آپ دے خُلق دے شیشے توں جھلک تک تک کے
اپنا کردار سجا کے تے بجھا لے دوزخ
آپ دے دین توں دور ہے حیاتی دوزخ
ایس دوری نوں مٹا کے تے بجھا لے دوزخ
رنگ محبوب دے وچ رنگ لے انگ انگ جھلیا
رب رسیا توں منا کے تے بجھا لے دوزخ
ساہ وچ شاہ وسا نعت دے حجرے بہہ کے
مشک تن وچ توں مچا کے تے بجھا لے دوزخ
وار دے وار دے بے مثل دے ناں توں سبھ کجھ
یار دا پیار بچا کے تے بجھا لے دوزخ
نقش اعجازؔ نبی دا توں نظر وچ رکھ کے
ورد ہو ہو دا پکا کے تے بجھا لے دوزخ
