(Last Updated On: )
دلوں، جانوں وی پیارے توں بناں میرا تے نئیں سرنا
ترے سوہنے دوارے توں بناں میرا تے نئیں سرنا
مینوں چوداں طبق بھاویں تلی تے چا لَوَن مُڑ وی
ترے آقا سہارے توں بناں میرا تے نئیں سرنا
میں من دا ہاں کہ جنت وچ بڑے اعلیٰ نظارے نیں
ترے مکھ دے نظارے توں بناں میرا تے نئیں سرنا
مِرے ساقی ہزاراں جام مے خانے توں ڈھیندے نیں
تری اکھ دے اشارے توں بناں میرا تے نئیں سرنا
ترے در تے نِوا کے سر نصیباں دی گھٹا کہندی
کہ زلفاں دے ہلارے توں بناں میرا تے نئیں سرنا
خدائی مینوں روندے نوں دلاسے دے دے تھک پئی اے
ترے مٹھڑے بلارے توں بناں میرا تے نئیں سرنا
اجے اعجاز مکھ تیرا مِری اکھیاں تے نئیں چھپیا
اجے دیدار سارے توں بناں میرا تے نئیں سرنا
