نذرانہ عقیدت : نور محمّد نور کپور تھلوی
پنجابی دے ہرمن پیارے بوٹے نوں گل و گلزار کرن والیاں وچ نور محمّد نور کپور تھلوی ہوراں دا ناں اچیچا اے ۔۔ایہ وی حضرت تنویر بخاری دے حلقہ تلامذہ وچ شامل سن ۔۔۔نور کپور تھلوی اپنے ایس مہان استاد توں عمر وچ 25 ورہے وڈے سن ۔۔ایہ تنویر بخاری ہوراں دے جادوئی اثر علم توں متاثر ہو کے ایہناں دے حلقہ تلامذہ وچ شامل ہوۓ سن ۔۔سید تنویر بخاری ہوراں دی شاگردی وچ آون دا عمل وی علم دی تریہہ ای سی ۔۔ایہ اجیھے شاگرد ویکھے گئے جہناں نوں استاد ہوریں وی “بابا جی” آکھدے ہندے سن ۔۔۔۔۔نور محمّد نور کپور تھلوی ہوراں اپنے استاد ہوراں نوں نذرانہ عقیدت انج پیش کردے نیں ۔۔نور صاحب دیاں چوکھیاں نظماں وچ تنویر بخاری ہوراں نوں سلام عقیدت ملدا اے ۔۔۔۔۔۔۔۔۔۔۔
گروآ ! تینوں سدا سلام
توں جو مرضی سانوں کہہ لے
تیرے اسیں ہمیش غلام
گروآ ! تینوں سدا سلام
ساڈی بلبلے وانگ حیاتی
تینوں حاصل ہویا دوام
گروآ ! تینوں سدا سلام
شوخ پنجابی ادب دا گھوڑا
جس دی تیرے ہتھ لگام
گروآ ! تینوں سدا سلام
توں کیوں چڑیاں دے مونھ لگیں
بازا ! اپنا ویکھ مقام
گروآ ! تینوں سدا سلام
شاعر سوچ کے شعر بناون
تینوں ہندا اے الہام
گروآ ! تینوں سدا سلام
اوتھوں تک نہ پہنچ اساڈی
جتھے گونجے تیرا نام
گروآ ! تینوں سدا سلام
گوپیاں نال جو کرے تمسخر
توں اوہ کرشن مراری شام
گروآ ! تینوں سدا سلام
پین پلون دی محفل مکی
ٹٹ گئے سنے صراحی جام
گروآ ! تینوں سدا سلام
نور تیرے جاوے بلھاری
اوہ ہے فرش تے توں ایں بام
گروآ ! تینوں سدا سلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنی اک ہور منظوم نظم وچ نور محمّد نور کپور تھلوی ہوریں تنویر بخاری ہوراں نوں انج نگھ نذرانہ پیش کر دے نیں ۔۔۔نمونہ لئی اک بند ۔۔۔۔۔۔۔۔۔۔
مینوں شوق دی چڑھی خماری اے
میری قسمت رب سواری اے
اج آیا پیر بخاری اے
ہن کھل جاون گیاں سبھ گنڈھاں
اج دسو نی میں کیہ ونڈاں
ساڈی ان ملیاں دی یاری اے
اج ہویا فضل غفاری اے
میری رب نے بیڑی تاری اے
ہن قسمت نوں میں کیوں بھنڈاں
اج دسو نی میں کیہ ونڈاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نور محمّد نور کپور تھلوی ہوریں اپنے استاد “سید تنویر بخاری ول چھٹی” لکھدیاں آکھدے نیں ۔۔۔۔۔
چل چٹھیے پہنچ کڑیال چھیتی میرے پیر نوں میرا کہویں سلام میرا
بھل گئے جے ہون اوہ خادماں نوں ‘ دس دئیں پئی نور ہے نام میرا
تہاڈے خیال نوں ہک نال لائی رکھاں اٹھے پہر ہن ایہو ہے کام میرا
لوکاں ایس میخانیوں رج پیتی خالی اجے تیکر کیوں ہے جام میرا
تہاڈے جہے بزرگ استاد کامل کرم کرن تاں مٹی اکسیرہووے
نظر مہر دی نال جے کدی تکو چیلا تساں دا خلق دا پیر ہووے
میرے ہتھ کمان پھڑاؤ ایسی لگا ہدف تے شعر دا تیر ہووے
تسیں روح دے روگ دے ہو ویدی تہاڈا بالکا کویں دلگیر ہووے
آؤنا لائل پوروں پرتنا بناں ملیوں تہاڈا دوش نہیں میرے نصیب دا اے
دور بیٹھ کے کرے علاج جیہڑا ایہہ وی معجزہ کسے طبیب دا اے
جہنوں چاہے اوہ وصل دا دے شربت کرنا فیصلہ کم حبیب دا اے
مرضی اپنی دا مالک آپ ہے اوہ ایہدے وچ نہ دخل رقیب دا اے
ساڈی عاجزانہ ایہو عرض حضرت ! سانوں دلے چوں کدی وساریو نہ
تہاڈے کرم دی آس تےاسیں زندہ بناں موت آئی سانوں ماریو نہ
ہتھ بنھ کے اسیں غلام تہاڈے بھلاں ساڈیاں سانوں چتاریو نہ
اسیں ہار جایے بھانویں لکھ واری تسیں اپنے قول نوں ہاریو نہ
۔۔۔۔۔۔۔۔۔۔۔۔۔۔۔۔۔۔۔۔۔۔۔
