پنجاب تے پاکستان

پنجاب دی اوہ کہانی جیہڑی آج تیکر کُج لوکاں ناسمجھی اچ تے، اکثریت نے بدنیتی اچ بیان نہیں کیتی۔کیوں کہ اوہ لوک ناصرف پنجاب بلکہ پاکستان دے نال وی مُخلص نہیں۔
1947ء اچ جد پاکستان بنیا تے پنجاب دی تاریخی زمین دا 46 فیصد حصہ بھارت ول چلا گیا۔
2 کروڑ پنحابیاں نوں آپنا آبائ علاقہ آپنی زمیناں جائیدادں حویلیاں آپنے کاروبار آپنے ڈھورڈنگر تے سب توں ودھ گل کے آپنے اجداد آپنے پُرکھاں دی نشانیاں اونہاں دیاں قبراں نوں چھڈ کے ہجرت کرنی پئ۔ ساڈے 20 لاکھ پنجابی انگریز، تے انگریزاں دے کُتیاں دی شیطانی چالاں دی وجہ توں شہید ہوگئے۔

پورے ہندوستان اچ پنجاب تے بنگال ہی اوہ خطے سن جس نوں انگریز نے تقسیم کیتا۔ پر تقسیم دا زیادہ گھاٹا پنجاب نو ہویا۔ تقسیم وی اینج کیتا جنج پٹھی چھری نال کھل لائی جاوے۔ پنجاب دے مسلم اکثریتی علاقے اک جعلی مردم شماری 1941 دے تحت بھارت نوں دے دتے گئے تے ایس طرح کئ غیر مسلم اکثریتی علاقے پاکستان اچ شامل کر دتے گئے تے عوام نوں اوہ علاقہ چھڈ دیون دا کہیا گیا۔ اے سب اوس ریاستی جبر دی بدترین مثال سی جس نے پنجاب دے دریا پنجابیاں دے لہو نال لال کر دتے۔ 20لاکھ پنجابیاں نے آپنے خون دا نظرانہ دے کے پاکستانی پنجاب دی بنیاد رکھی جیہڑی آج وی قائم بلکہ پاکستان دی سالمیت دی گارنٹی ہے۔

انگریز دے ایس ظُلم دا سبب پنجابیاں ولوں اوہ مزاحمت سی جس دی وجہ توں انگریز پنجاب تے صرف نوے سال حاکم رہیا، جد کہ باقی ہندوستان تے انگریز دو سو سال تے بنگال تے ایس توں وی کُج چر ودھ حاکم رہیا۔
ہندوستان دی کئ ریاستاں انگریز دی باج گُزار سن۔ پر پنجابیاں کدے وی اے گل قبول نا کیتی بلکہ آخر دم تیکر تلواراں نیام توں باہر رکھیاں۔اے ہی وجہ سی کہ پنجاب اوہ خطہ سی جس تے انگریز سب توں آخر تے قابض ہو سکیا، تے او وی غداراں دی وجہ توں۔ ایس قبضے توں بعد وی پنجابیاں کدے وی انگریز نوں دل توں آپنا حاکم نا تسلیم کیتا بلکہ مزاحمت کردے رہے۔ پنجاب دے پُتر تاریخ اچ انَکَھ نال جیون لئ آپنی جان تیکر دی پرواہ نہیں کردے رہے جس دی کئ ہزار مثالاں موجود نے۔

انگریزاں دے خلاف 1857ء دی جنگ آزادی دے پہلے مجاہد ساڈے شاہ عبدالقادر لدھیانوی اک پنجابی سن۔
جناں ناصرف انگریزاں دے خلاف جہاد کرن دا فتویٰ دتا، بلکہ خود وی انگریزاں دے خلاف جہاد کیتا۔ ساڈے رائے احمد خان کھرل نے گوگیرہ چھاونی تے جیل تباہ کر دتی۔ ساڈے مُراد فتیانہ نے لارڈ برکلے دا سر راوی دے دریا تے اندر لاہ دتا سی۔ ساڈے ولیداد مردانہ نے اک مہینہ انگریز نوں ساہیوال تے ڈک کے رکھیا۔ ساڈے بھگت سنگھ نے لاہور دے انگریز مئیر نوں سڑک تے گولی مار کے مار دتا، ساڈے محمد خان چشتی نے سنگاپور جا کے انگریز مارے۔ ساڈے اودھم سنگھ تے انگلینڈ جا کے جنرل ڈائر نوں ٹھوک دتا سی،ساڈے نادر قریشی جھنگ اچ لڑیا تے کالا پانی سزا کٹی، ساڈے نور محمد کاٹھیا چنیوٹ چ انگریز دے خلاف شہادت پائی تے ساڈے سورج سنگھ نے چیلیانوالہ (منڈی بہاؤالدین) چ تین ہزار انگریز مارے۔

ریشمی رومال تحریک چلان آلے ساڈے مولانا عبیداللہ سندھی وی اک پنجابی سن۔ مولانا عبیداللہ سندھی، پنجاب دے شہر سیالکوٹ دے اک پنجابی سکھ گھرانے وچ پیدا ہوۓ تے بعد وچ اسلام قبول کیتا سیاسی میدان اچ مسلم لیگ نوں جو سپورٹ پنجاب وچ ملی باقی ہندوستان بشمول اُتر پردیش، کے پی کے، بلوچستان یا ہندوستان دے کسی وی اوس علاقے جتھے انگریز خود حاکم سن نہیں ملی۔ کُج ریاستاں جیہڑی انگریز نوں ٹیکس دیندیاں سن اوہ ایس جمہوری نظام اچ شامل نہیں سن.
پاکستان دا نظریہ اک پنجابی علامہ اقبال نے دیتا۔ علامہ اقبال دا تعلق پنجاب دے اک سوہنے شہر سیالکوٹ توں سی. مملکت پاکستان دا نقشہ تے نام وی اک پنجابی چوہدری رحمت علی نے ہی رکھیا۔ مولانا ظفر علی خان جنہاں آپنے اخبار "زمیندار" دے راہوں مُسلم لیگ دا پیغام پنجاب دے ہر گھر تیکر پہنچایا اوی وزیرآباد دے اک پنجابی ہی سن۔ پاکستان دا قومی ترانہ وی پنجاب دے ہی پُتر حفیظ جالندھری نے لکھیا۔

مسلم لیگ دے لاہور اچ قرارداد پاکستان دے جلسے اچ کئ لکھ پنجابیاں دی شمولیت تے قرارداد دی ممظوری ایس گل دی گواہ ہے کہ پنجابی ہی پاکستان دے بانی عوام نے۔
مسلم لیگ ایس طرح دا جلسہ لاہور توں علاوہ کدھرے نا کر سکی ۔اینہاں مجاہداں دی وجہ توں انگریز سخت عذاب اچ مبتلا ہو گیا تے اوس نے اک مکروہ عمل دے ذریعے پنجاب دی اینج دی ونڈ کیتی جس دی مثال باقی ہندوستان اچ نہیں ملی۔ پنجابیاں نوں آپنی زمین مال مویشی کاروبار رشتہ داریاں سب چھڈ کے ہجرت کرنا پیئ۔ تے اے پاک وطن وجود اچ آیا۔

پر آج کل کُج نمک حرام لوک جیہڑے پاکستان بنن دی ایس مشکل گھڑی توں تین چار سال بعد ہوائ جہازاں یا راجھستان توں ٹریناں دے ذریعے بہتر زندگی تے روزگار دی تلاش اچ سندھ تے پنجاب دے کُج شہراں اچ منتقل ہوئے، پاکستان دے بانی ہون دے دعویدار نے۔تے پنجابیاں نوں انگریز دا وفادار کہندے نے۔ پنجاب دے ہزاراں مُجاہد جنہاں انگریز نوں للکاریا گنائے جا سکدے نے پر کیا اونہاں لوکاں کول اک وی ایسا نام موجود ہے؟؟؟ بلکل نہیں۔ آج اوہ لوک سانوں کہندے نے کہ آسی پاکستان بنایا۔

اس تے ساڈا سوال اے کہ فیر پاکستان اچ اُتر پردیش یا گُجرات شامل کیوں نہیں ؟؟؟؟ جدوں کہ پاکستان اچ تے پنجاب تے سندھ شامل نے۔ جیہڑے کے پنجابیاں تے سندھیاں دی سخت محنت تے بے پناہ قربانیاں دی وجہ توں ای شامل ہوۓگلاں کرنیاں جھوٹ بولنا سوکھا ہے، پر عمل کرنا، قُربانی دینی بہوں اوکھی ہے۔

اے جس تن نوں لگدی ہے اوہ تن ای جاندا اے۔
جیوے پنجابی قوم
جیوے پنجاب
وسے پیارا پاکستان