پنجاب دی دھرتی دنیا دی 3 قدیم تہذیباں چوں اک اے۔ اے انڈس ویلی سولائزیشن والی زمین اے۔ اے ذراعت دے کرکے دنیا دا سب توں زیادہ خوشحال خطہ رے آ اے۔ اتھارویں صدی وچ صنعتی معیشت دے وجود وچ آن توں پہلوں معیشت دا دارو مدار ذرعی معیشت تے ای ھوندا سی۔ جد کہ پنجاب دا قدرتی طور تے جغرافیہ ایہو جیہا اے کہ دنیا تے حکمرانی کرن والے آں نوں پنجاب آنا پیندا اے۔ ایس لئی سکندر اعظم توں لے کے محمود غزنوی تک تے محمود غزنوی توں لے کے انگریز تک پنجاب آندے رئے۔ پنجاب تے حملے وی ھوندے رئے ‘ حکمرانی وی ھوندی رئی تے یاری وی رکھی جاندی رئی۔
جد پنجاب وچ پنجاب دا راکھا نئیں سی ھوندا تے نادر شاہ افشار تے احمد شاہ ابدالی ورغے ٹٹ پونجیے پنجاب تے حملے کردے رئے۔ جد پنجاب وچ پنجاب دا راکھا نئیں سی ھوندا تے مغلاں ورغے باروں آکے پنجاب تے حکمرانی کردے رئے۔ جد پنجاب وچ پنجاب دا راکھا ھوندا سی تے اودوں ایس دھرتی تے سکندر اعظم جئے بادشاہ دا ٹاکرا راجہ پورس نال ھویا تے سکندر اعظم نوں پنجاب تے قبضے دی ھمت نہ ھوئی تے سکندر اعظم نے پنجاب دے راکھے راجہ پورس نال یاری لائی۔
محمود غزنوی دا ٹاکرا 1008 وچ راجہ جے پال نال ھویا تے راجہ جے پال نے پنجاب دے پشاور والے حصے نوں محمود غزنوی توں بچا نہ سکن دے کرکے محمود غزنوی نوں خراج دین دے بجائے خودکشی کرلئی پر خراج نہ دتا۔ فے وی محمود غزنوی کولوں راجہ جے پال دے پتر راجہ آنند پال کولوں وی پنجاب کھو نہ ھویا تے راجہ آنند پال دے مرن توں مگروں اوس دے پتر ترلوچن پال کولوں 1022 وچ پنجاب کھویا۔ محمود غزنوی نوں پنجاب تے قبضہ کرن لئی 17 واری حملے کرنے پئے۔
انگریزاں نے سارے بھارت تے قبضہ کرلے آ پر پنجاب تے 1849 تک نہ کیتا تے مھاراجہ رنجیت سنگھ نال یاری لا کے رکھی۔ کیونکہ نپولین بونا پارٹ تے زارِ روس وی بحر ھند تک اپنے قبضے نوں ودھان دے کھیل وچ لگے ھوئے سن۔ مھاراجہ رنجیت سنگھ نال فرانس دا وی واسطہ سی۔ ایس لئی انگریز نوں خطرہ سی کہ کدھرے نپولین بونا پارٹ یا زارِ روس نال مھاراجہ رنجیت سنگھ رلت نہ کر لے تے انگریز دی پنجاب نال یاری دے نہ ھون دے کرکے انگریز کدھرے بھارت نوں ای نپولین بونا پارٹ یا زارِ روس دے ھتھوں کھوا نہ بیٹھے۔
او تے مھاراجہ رنجیت سنگھ دے 1839 وچ مرن توں مگروں کسے کولوں پنجاب سمبھلیا نئیں گیا۔ ایس لئی انگریز نے پنجاب نوں سمبھال لے آ۔ اے ھور گل اے کہ انگریز نے پنجاب سمبھال کے وی 1901 وچ پنجاب دے ٹوٹے کیتے تے جاندے جاندے 1947 وچ وی پنجاب دے ٹوٹے کرکے چلا گیا تاکہ پنجاب ماڑا روے تے اپنے گوانڈ وچ روس یا چین نال سانجھ نہ کر سکے تے روس نوں روکن لئی بنائے گئے افغانستان دے بفر زون لئی ونگار وگدا روے تاکہ روس نوں بحر ھند تک پہنچن توں افغانستان وچ ای ڈک کے رکھیا جاندا روے۔
ھن اک واری فے دنیا تے حکمرانی کرن والے بدل رئے نے۔ ھن دنیا تے حکمرانی دا جوڑ چین تے امریکہ وچ پینا اے۔ جداں کہ ھزاراں سالاں توں قدرتی طور تے دنیا تے حکمرانی کرن والے آں نوں پنجاب آنا پیندا اے۔ ایس لئی ھن چین تے امریکہ نوں پنجاب انا پے نا اے۔ ایس لئی پنجاب دی اھمیت ودہ گئی اے۔ بلکہ بوھتی ودہ گئی اے کیونکہ ھن جوڑ چین تے امریکہ دا اے تے چین گوانڈی وی اے پنجاب دا۔ چین نے 2030 تک بحر ھند تک جانا اے تے امریکہ نے چین نوں بحر ھند تک جان توں روکنا اے۔ چین نے بحر ھند تک جانا وی پاکستان وچوں لنگ کے اے۔ ایس لئی ھن لوڑ امریکہ نوں وی پنجاب دی اے تے لوڑ چین نوں وی پنجاب دی اے۔
ملکاں وچ مفاداں دا کھیل ھوندا اے۔ ایس لئی پنجابی نہ کسے قوم نوں الامہ دین تے نہ ترلے پان۔ پنجاب ولوں جی آیا نوں !!! گل قوماں دے مفاد دی بنیاد تے ای ھووے گی۔ پر گل کرے گا کون؟ پنجابی دا مسئلہ امریکہ یا چین دا اپس وچ ٹاکرا نئیں۔ پنجابی دا مسئلہ اے وے کہ پنجابیاں کول راجہ پورس ' راجہ جے پال ' مھاراجہ رنجیت سنگھ ورگا پنجاب دا راکھا کون اے؟
