اسلام میں والدین پر اپنی اولاد کیلیٸے ایک اہم ذمیداری یہ بھی عاٸد ہے کہ وہ اپنے بچوں اور بچیوں کے اچھے اچھے و خوب صورت اور بامقصد نام رکھیں مگر ہمارے معاشرے میں شاید ناخواندگی ، لاشعوری اور کچھ قباٸلی و خاندانی روایات کے باعث ایسے ایسے غیر انسانی اور غیر اسلامی نام بھی رکھے جاتے ہیں جس پر باشعور لوگ طنز، افسوس اور حقارت و نفرت اور حیرت کا اظہار بھی کرتے ہیں . بہت سے ایسے نام ہیں جن سے رعب و دبدبے اور خوف کا اظہار ہوتا ہے مثلاً ہیبت خان ، چنگیز خان ، بہادر خان ، شیر خان اور کالو خان وغیرہ . موسم دن اور مہینوں کے نام بھی انسانوں پر رکھنے کا رواج بہت ہے مثلاً محرم، صفر، رجب، شعبان اور رمضان . رجب کے نام سے تو اس وقت ترکی کے باکمال و باصلاحیت اور جرٸت مند صدر رجب طیب اردوان دنیا بھر میں مشہور ہیں . اس کے علاوہ عطر خان جنگل خان جنگی خان جبکہ خواتین میں غزل ،غزالہ ، شہربانو ، ماہ گل ماہ جبین اور ماہ تاب وغیرہ خوفناک اور عجیب تو نہیں ہیں مگر دلچسپی کے حامل نام ضرور ہیں تو مرد حضرات میں دنوں کے نام بھی رکھنے کا رواج عام ہے جیسے سومر ،منگل اور جمعہ جن کے ساتھ خان کا لفظ ملایا جاتا ہے وہ کچھ اس طرح سے ہوتے ہیں جمعہ خان منگل خان سومر خان اور آچر خان یعنی اتوار خان کیوں کہ سندھی زبان میں اتوار کو آچر کہا جاتا ہے . سندھی میں انسانوں پر پھلوں اور درختوں کے نام بھی رکھے جاتے ہیں اردو میں وہ انار ، آم اور سیب وغیرہ بنتے ہیں.
آجکل خواتین کے نام کچھ اس طرح کے زیادہ رکھے جا رہے ہیں جن میں ، دعا ، ایمان ،حیا اور سفینہ وغیرہ . اب اگر کسی حیا نامی لڑکی یا عورت کے بارے میں ان کے گھر والوں سے یہ پوچھا جاٸے کہ حیا گھر میں ہے تو اگر وہ گھر میں موجود ہے تو ٹھیک ورنہ جواب یہ ملے گا کہ حیا گھر میں نہیں ہے یعنی گھر میں ”حیا“ نہیں ہے ٹھیک اسی طرح ”ایمان“ اور ”دعا“ کے بارے میں بھی اسی قسم کا جواب ہی ملے گا. کچھ ہفتے قبل کراچی سے دعا نامی لڑکی اغوا ہو گٸی تھی اور پھر دعا کی بازیابی کیلیٸے ”دعاٸیں “ کی جا رہی تھیں یا ”دعاٸیں “ مانگی جا رہی تھیں باالآخر دعاٶں کی بدولت ”دعا“ منگی کی بازیابی ممکن ہو سکی اور یہ مذکورہ نام غیر انسانی ہی ہیں.
سفینہ کا نام بھی غیر انسانی ہی ہے یہ عربی کا لفظ ہے جس کے معنی کَشتی کے ہیں . اب اگر کسی سے یہ سوال کیا جاٸے کہ سفینہ یعنی کشتی گھر میں ہے اگر وہ گھر میں ہے یا نہیں ہے دونوں صورتوں میں بہت عجیب بلکہ معیوب لگتا ہے کہ کسی عورت کو کشتی کے طور پر مخاطب کیا جاٸے یا لکھا اور پڑھا جاٸے . مرد حضرات میں تو اس قسم کے نام اور بھی زیادہ ہیں جن میں اسلام ، برکت ، سمندر ، دریا اور طوطا وغیرہ کے نام شامل ہیں . یہ بڑا عجیب لگتا ہے کہ جب ان کے بارے میں پو چھا جاٸے تو گھر میں دکان اور دفتر وغیرہ میں موجود نہ ہونے کی صورت میں یہ کہا جاٸے کہ اسلام گھر میں نہیں ہے برکت گھر میں نہیں ہے یعنی کہ اسلام اور برکت گھر میں اور دفتر وغیرہ میں نہیں ہیں اور ویسے بھی ان ناموں سے ہٹ کر بھی غور کیا جاٸے تو ہمارے یہاں حقیقی معنوں میں نہ اسلام ہے اور ہی برکت ہے . بلوچ سندھی اور سراٸیکی اقوام و قباٸل میں انسانوں کے ایسے بہت سے غیر انسانی نام ہیں جن کا تعلق موسم نباتات پرندے پھول اور پھل وغیرہ سے بنتا ہے جن کے ساتھ خان کا لفظ ملایا جاتا ہے مثلاً دریا خان سمندر خان ہزار خان شربت خان بہار خان ساون خان طوطا خان مور خان مٹھا خان اور کوڑا خان وغیرہ شامل ہیں . خواتین میں مٹھی ، کوڑی ، طوطی اور زیتون بانو وغیرہ جیسے نام بہت پاٸے جاتے ہیں . یہ اور اس قسم کے اور بھی بہت سے نام ہیں جو تعلیم یافتہ ماحول میں ندامت اور خجالت کاموجب بنتے ہیں . ہزار خان نام کے ہزاروں لوگ موجود ہیں جن میں سے ایک ضلع صحبت پور بلوچستان کے میر ہزار خان کھوسہ بلوچستان ہاٸیکورٹ کے چیف جسٹس بعد میں گورنر اور پھر ملک کے نگران وزیر اعظم مقرر ہوٸے ایک اور میر ہزار خان بجارانی جو کشمور سندھ کے تھے وہ پی پی پی سندھ کے صدر اور بعد ازاں صوباٸی اور وفاقی وزیر و سینیٹر بھی رہے چند برس قبل انہوں نے مبینہ طور پر اپنی اہلیہ سے ناراضگی کے باعث کراچی میں واقع اپنے گھر میں خود کشی کی تھی . انب خان گل خان پھوٹو خان اور گلزار خان وغیرہ کے بہت سے نام ہیں . سندھی زبان میں آم کو انب کہا جاتا ہے اور سندھی میں انب خان ایک نامور ادیب اور دانشور ہیں جبکہ پھوٹو زرداری سندھی زبان کے بہت مشہور و مقبول اور سوز و گداز کی آواز کے حامل گلوکار گزرے ہیں پھوٹو کو اردو میں الاٸچی کہا جاتا ہے .
