نام سکندر علی اور تخلص وجد تھا۔
22 جنوری 1913ء کو ویجاپور، ضلع اورنگ آباد(حیدرآباد ،دکن) میں پیدا ہوئے۔
ابتدائی تعلیم اورنگ آباد میں ہوئی اور وہیں ۱۹۳۰ء میں شاعری کا آغاز ہوا۔
۱۹۳۵ء میں عثمانیہ یونیورسٹی سے بی اے کا امتحان پاس کیا۔
۱۹۳۸ء میں حیدرآباد سول سروس کے امتحان میں کام یاب رہے۔
۱۹۳۸ء سے ۱۹۳۹ء تک عدالتی کام کی ٹریننگ کے سلسلے میں سیتا پور(یوپی) میں رہے۔ بعد ازاں اورنگ آباد میں اسپیثل آفیسر، ڈیپارٹمنٹل انکوائریز رہے۔
۱۶؍ مئی ۱۹۸۳ء کو اورنگ آباد میں وفات پاگئے۔
’’لہو ترنگ‘‘ کے نام سے ان کی شاعری کی کتاب چھپ گئی ہے۔
’’بیاض مریم‘‘ بھی ان کا شعری مجموعہ ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منتخب کلام:
جنوں میں موج برق کا جو رخ ذرا بدل گیا
غبار نور شعلہ بار پیکروں میں ڈھل گیا
خودی کی جب ہوا چلی تو سب کا دل مچل گیا
کوئی ادھر نکل گیا کوئی ادھر نکل گیا
ابھی چھڑا نہیں ربابِ داستان زندگی
عدم کی گرد میں نہاں ہے کاروان زندگی
انھیں میں تھی زمین بھی ایک شعلہ شرر فشاں
بجھی ہزارہا برس میں مدتوں اٹھا دھواں
یہ رات جب کٹی تو کوہ و دشت و جو ہوئے عیاں
دیا سمندروں کو آفتاب نے پیام جاں
بنی اسی عمل سے سطح آب کان زندگی
عجیب شان سے رواں ہے کاروان زندگی
کھلی ہے مدتوں کے بعد اب زبان زندگی
عدم کے بت کدے میں دی گئی اذان زندگی
۔۔۔۔۔۔۔۔۔۔۔۔۔۔۔۔۔
ظلمت شب ہی سحر ہو جاۓ گی
شدت غم چارہ گر ہو جاۓ گی
رونے والے یوں مصیبت پر نہ رو
زندگی اک درد سر ہو جاۓ گی
بعد تعمیر مکاں زنجیر غم
الفت دیوار و در ہو جاۓ گی
لا دلیل عشق و مستی درمیاں
ختم بحث خیر و شر ہو جاۓ گی
ذکر اپنا جا بجا اچھا نہیں
سب کہانی بے اثر ہو جاۓ گی
صبح راحت کے تصور کے طفیل
ہر شب غم مختصر ہو جاۓ گی
صرف و عزم آتشیں درکار ہے
عمر سرگرم سفر ہو جاۓ گی
آ رہا ہے انقلاب حشر خیز
زندگی زیر و زبر ہو جاۓ گی
۔۔۔۔۔۔۔۔۔۔۔۔۔۔۔۔۔
شوق کی نکتہ دانیاں نہ گئیں
رات بیتی کہانیاں نہ گئیں
حسن نے دی ہزار بار شکست
عشق کی لنترانیاں نہ گئیں
نقش بن بن کے رہ گئیں دل میں
سرسری نوجوانیاں نہ گئیں
چہرہء زندگی کی رونق ہیں
حوصلوں کی نشانیاں نہ گئیں
وجدؔ مایوسیوں کے زور میں بھی
عزم کی کامرانیاں نہ گئیں
۔۔۔۔۔۔۔۔۔۔۔۔۔۔۔۔۔۔۔
رنگ لایا دوانہ پن میرا
سی رہے ہیں وہ پیرہن میرا
میں نوید بہار لایا تھا
تذکرہ ہر چمن چمن میرا
شبنم فکر و گلستان سخن
جگمگاتا ہے پھولبن میرا
لالہ و گل کھلے ہیں کانٹوں پر
ان میں الجھا تھا پیرہن میرا
یہ بھی اب تک نہیں ہوا معلوم
میں سجن کا ہوں یا سجن میرا
جو بھی ہے سب تری عنایت ہے
جان میری نہ یہ بدن میرا
کیا تجھے بھی خیال آتا ہے
کبھی بھولے سے جان من میرا
اس نے دیکھا تھا مسکرا کے کبھی
عمر بھر دل رہا مگن میرا
اے شراب سخن کے متوالے
کچھ سخن ہی نہیں ہے فن میرا
وجدؔ کس کا وطن کہاں کا وطن
وہ جہاں ہیں وہیں وطن میرا
۔۔۔۔۔۔۔۔۔۔۔۔۔۔۔۔۔۔۔
بشکریہ خالد محمود
