17_اگست….. : پنجابی ہولوکاسٹ ڈے
جدوں برصغیر دیاں دوجیاں قوماں دے لوک آزادی دا جشن منا رہے سن. تے پنجابیاں دے گھراں وچ وین سیاپے ہورہے سن.
انگریزی سامراج تے اوہدے بدنسل ہندوستانی پٹھوواں دی ناپاک تے گھناونی سازشاں دے نتیجے وچ
بابافرید (رح)، وارث شاہ (رح)، میاں محمد بخش (رح)، شاہ حسین (رح) تے خواجہ غلام فرید (رح) ورگے اسلام، امن تے انسانیت دے سچے پرچارکاں دی مقدس دھرتی پنجاب دے ٹوٹے کردتے گئے.
راجہ پورس، دلا بھٹی تے احمد کھرل شہید ورگے سورمیاں دا دیس پنجاب بیدردی نال وڈھ ٹک دتا گیا.
اک مخصوص ایجنڈے ہیٹھ پنجاب وچ مذہب دے نام اپر درندگی تے وحشت دا اوہ جھکھڑ جھولیا گیا، اوہ بھانبڑ بالیا گیا.
جہدے وچ گھٹ ودھ 20 لکھ پرامن ہندو، سکھ تے مسلمان پنجابی موت دے کھوہ وچ سٹ دتے گئے.
کروڑ توں ودھ ہسدے وسدے پنجابی گھروں بے گھر ہوگئے.
پنجابی حیادار عورتاں دیاں عزتاں مذہباں دی بھینٹ چڑھ گئیاں.
معصوم پنجابی بچے مذہبی نیزیاں اپر اچھالے گئے.
پنجابی مردیاں دی لاوارث لاشاں کتے تے گرجھاں کھاندیاں رہیاں.
ہسدے وسدے پنجابیاں دے ویہڑے اجاڑا پے گیا.
پنجاب دے شہر تے پنڈ لہو لہو ہو گئے.
انساناں دی درندگی تے دوجے پاسے بیچارگی اپر انسانیت وی وین کر اٹھی.
مذہبی ٹھیکیداراں دے کرتوتاں اپر مذہب وی سر پٹ کے رہ گئے.
انسانی تاریخ وچ اتنی گھٹ مدت وچ اتنا وڈا قتل عام، اتنی وڈی ہجرت تے اتنا وڈا اجاڑا شاید ہور کوئی نہیں ہووے گا.
اج بیلے لاشاں وچھیاں ، اج لہو دی بھری چناب
اسیں کیہڑے جشن مناویے ، ساڈا اجڑ گیا پنجاب
یہ تحریر فیس بُک کے اس پیج سے لی گئی ہے۔
